2023թ.-ի սեպտեմբերի 26-ին կայացած Հարթակի հերթական հանդիպման ընթացքում քննարկվեցին «Իրավունքների պաշտպանություն առանց սահմանների» ՀԿ-ի ենթադրամաշնորհային ծրագրի կատարված աշխատանքները:
Դրանք վերաբերում էին Պրոբացիոն ծառայության շրջանակներում հանրային աշխատանքների կազմակերպման և իրականացման արդյունավետության գնահատմանը, որը բխում է Քրեակատարողական և Պրոբացիայի բարեփոխումների ռազմավարությունից:
Մշտադիտարկման և վերլուծության միջոցով կբացահայտվի Պրոբացիոն ծառայության շրջանակներում համայնքային ծառայությունում առկա խնդիրները, կազմակերպչական և իրականացման առանձնահատկությունները: Կհետազոտվի նաև համայնքային ծառայության հնարավոր տեսակների շրջանակը, դրանց արդյունավետ իրականացման հեռանկարները և վերահսկողության միջոցները:
Հանդիպմանը քննարկվեց նաև Հարթակի 4 աշխատանքային խմբերի համակարգողների ընտրության կարգը։ Նախնական որոշվեց, որ կազմակերպությունները կարող են կամ առաջադրել այլ կազմակերպության թեկնածություն, կամ ինքնառաջադրվել, որին կհաջորդի փակ քվեարկություն:
Օրակարգի երկրորդ թեման` Կատարողական վարույթի մասին ՀՀ օրենքի նախագծին առնչվող դիտարկումների վերաբերյալ, «Իրավունքի զարգացման և պաշտպանության հիմնադրամի» փորձագետ Սերգեյ Գրիգորյանը ներկայացրեց մասամբ` հղում անելով հետազոտման ընթացքի որոշ հարցերի ոչ ավարտուն կարգավիճակը: Որոշվեց, որ դրանք կրկին կքննարկվի Հարթակի հաջորդ հանդիպումների ժամանակ։